Մուտքի մէջ > Եկեղեցիներ > ՍՈՒՐԲ ՓՐԿԻՉ ԵԿԵՂԵՑԻ ՂԱԼԱԹԻԱ 1834

ՍՈՒՐԲ ՓՐԿԻՉ ԵԿԵՂԵՑԻ ՂԱԼԱԹԻԱ 1834

Պոլսոյ առաջին Հայ Կաթողիկէ եկեղեցին է: Կոստանդնուպոլսոյ Հայ Կաթողիկէ համայնքը Մահմուտ Բ. կայսեր օրերէն սկսած էր բանակցութիւններ կատարել, որպէսզի համայնքը իրեն յատուկ եկեղեցի մը եւ առաջնորդ մը ունենար: Այս նպատակով Ղալաթիոյ Կաթողիկէ համայնքը պէտք եղած գումարը հաւաքելով Քարագիւղի Քէմէրալթը կոչուած փողոցին վրայ գտնուող կառոյց մը կը գնէ: Պէտք եղած արտօնութիւնները ստանալէ ետք, 12 Մայիս 1832-ին եկեղեցիի հիմքը կը դրուի եւ 13 Յունուար 1834-ին եկեղեցին օծուելով պաշտամունքի կը բացուի: Առաջին Հայ Կաթողիկէ եկեղեցին ըլլալով, յատուկ բծախնդրութեամբ մը շինուած է եւ կը նմանի հնագոյն տաճարի մը: Եկեղեցիին մէջ կը գտնուին Սուրբ Թադէոսի եւ Սուրբ Բարթուղիմէոսի որմանկարները: Ունի հինգ խորաններ, մայր խորանի քովը գտնուող խորանը յատկացուած է մկրտութեան արարողութիւններու: Կը գտնուի նաեւ Սուրբ Աստուածածնի նուիրուած խորան մը, որուն վրայ կը գտնուին բարակ սիւներ, շրջապատուած յատուկ վարագոյրներով, որոնց մէջտեղ կը գտնուին Սուրբ Աստուածածնի եւ Յիսուս Քրիստոսի թագադրուած սրբանկարը: Երբ դեռ շինութիւնը կը շարունակուէր, Պոլսոյ մէջ ժանտախտի համաճարակ մը կը սկսի: Վկայութիւններ կան թէ համաճարակի օրերուն Հայ համայնքը 25 Մարտ թուականին այս սրբանկարը թափօրով կը պտտցնէ Պոլսոյ փողոցներուն մէջ եւ ասկէ ետք համաճարակը կը վերջանայ: Այս դէպքէն վերջ Մահմուտ Բ. սուլթանը եկեղեցիին թանկագին ադամանդակուռ արծաթեայ գիսաւոր աստղ մը կը նուիրէ: Այս աւանդութիւնը մինչեւ այսօր կը շարունակուի եւ ամէն տարի Յարութեան Կիրակին յաջորդող մեռելոցի օրը Տիրամօր պատկերով հանդիսաւոր թափօր տեղի կ'ունենայ եկեղեցւոյ շրջափակէն ներս:

Galeri

example4

ԵՆԹԱԲԱԺԱՆՈՒՄ

ԿԻՐԱԿՆՕՐԵԱՅ ԱՍՏՈՒԾՈՅ ԽՕՍՔԸ

Իսկ փարիսեցիները, երբ լսեցին թէ պապանձեցուց սադուկեցիները, միասին հաւաքուեցան։ Անոնցմէ մէկը, որ Օրէնքի վարդապետ էր, փորձելով հարցուց. «Վարդապե՛տ, ո՞րն է Օրէնքի ամենամեծ պատուիրանը»։ Յիսուս պատասխանեց. «Սիրէ՛ քու Տէր Աստուածդ բոլոր սրտովդ, բոլոր հոգիովդ եւ բոլոր մտքովդ. այս է մեծ եւ առաջին պատուիրանը։ Իսկ երկրորդը` ասոր նման է։ Սիրէ՛ ընկերդ քու անձիդ պէս։ Այս երկու պատուիրաններուն վրայ հիմնուած են ամբողջ Օրէնքն ու Մարգարէները»։ Երբ փարիսեցիները հաւաքուեցան` Յիսուս հարցուց անոնց. «Ի՞նչ կը խորհիք Քրիստոսի մասին, որո՞ւ որդին է»։ «Դաւիթի», պատասխանեցին։ Յիսուս աւելցուց. «Իսկ ի՞նչպէս Դաւիթ Հոգիով զինքը Տէր կը կոչէ եւ կ'ըսէ։ Տէրը ըսաւ իր տիրոջս. Նստէ՛ աջ կողմս, մինչեւ որ թշնամիներդ ոտքերուդ պատուանդան դնեմ։ Իսկ եթէ Դաւիթ զինքը Տէր կը կոչէ, ի՞նչպէս կրնայ անոր որդին ըլլալ»։ Ոչ ոք կրնար անոր պատասխան տալ. եւ այդ օրէն ետք` ո՛չ ոք կը համարձակէր իրեն բան մը հարցնել։ Այն ատեն Յիսուս խօսեցաւ ժողովուրդին եւ աշակերտներուն` ըսելով. «Մովսէսի աթոռը նստան դպիրներն ու փարիսեցիները. ինչ որ ըսեն անոնք ձեզի` ըրէք ու պահեցէք, բայց իրենց գործերուն համեմատ մի՛ գործէք. որովհետեւ կ'ըսեն բայց չեն ըներ։ Ծանր եւ դժուարակիր բեռներ կը կապեն ու մարդոց ուսերուն վրայ կը դնեն, եւ իրենք` մատո՛վ անգամ չեն ուզեր շարժել զանոնք։ Իրենց բոլոր գործերը կը կատարեն մարդոց երեւնալու համար. կը լայնցնեն իրենց գրապանակները եւ կ'երկնցնեն զգեստներու քղանցքները. կը սիրեն խնճոյքներու մէջ առաջին տեղերը գրաւել եւ ժողովարաններու մէջ` առաջին աթոռները, հրապարակներու վրայ ողջոյն ընդունիլ եւ մարդերէն կոչուիլ «Ռաբբի՛, Ռաբբի՛»։ Բայց դուք ո՛չ մէկը վարդապետ կոչեցէք, որովհետեւ մէ՛կ է ձեր ուսուցիչը եւ դուք ամէնքդ եղբայրներ էք։ Երկրի վրայ ո՛չ մէկը ձեզի հայր մի՛ կոչէք, որովհետեւ մէ՛կ է ձեր Հայրը` որ երկինքն է։ Մի՛ կոչուիք ուսուցիչ, որովհետեւ ձեր ուսուցիչը Քրիստոսն է։ Եւ ձեր մէջէն մեծը` թող ձեր սպասաւորն ըլլայ։ Ո՛վ որ իր անձը բարձրացնէ` պիտի խոնարհի, եւ ո՛վ որ իր անձը խոնարհեցնէ` պիտի բարձրանայ։

Մատթէոս 22, 34 - 23, 12

Նուիրատուութիւն

ՆՈՒԻՐԱՏՈՒՈՒԹԵԱՆ ՀԱՄԱՐ